ലോകത്താകമാനം കാർഷിക രംഗത്തുണ്ടാകുന്ന മാറ്റങ്ങൾ ഉൾക്കൊള്ളുവാനും നമ്മുടെ കാർഷിക മേഖലക്ക് ഉതകുംവിധം പ്രവർത്തികമാക്കുവാനും കർഷകർക്ക് ഇനിയും അവസരം ഉണ്ടാക്കും. സംസ്ഥാന സർക്കാരിന്റെ മൂന്നാം നൂറുദിന കർമ്മപരിപാടിയുടെ ഭാഗമായി വിവിധ വിപണി ഇടപെടലുകളുടെ സംസ്ഥാനതല പ്രവർത്തനം ആരംഭിച്ചു.

ഇസ്രയേൽ കാർഷിക രീതികളെക്കുറിച്ച് പഠിക്കാൻ കർഷകരുടെ ഒരു സംഘത്തെ ഇസ്രായേലിലേക്കും കൂൺ കൃഷിയെ കുറിച്ച് പഠിക്കുന്നതിനായി മറ്റൊരു സംഘത്തെ സോളാനിലേക്കും അയയ്ച്ചു. ഇനിയും കർഷകരെ രാജ്യത്തിനകത്തും പുറത്തുമുള്ള കാർഷികരീതികളെക്കുറിച്ച് പഠിക്കുവാനായി അയക്കും. പഴവർഗ കൃഷിരീതികൾ മനസ്സിലാക്കുവാൻ കർഷകരെ വിയറ്റ്നാമിലേക്ക് അയക്കുന്നതിനെക്കുറിച്ച് വകുപ്പ് ആലോചിക്കുന്നുണ്ട്. കാർഷികമേഖലയിൽ പരമ്പരാഗത രീതിയിൽ നിന്നുള്ള മാറ്റം അനിവാര്യമാണ്. ഒരു വിളയ്ക്ക് ഒരു പദ്ധതി എന്നരീതിക്ക് പകരം കേരളത്തിന്റെ വ്യത്യസ്ത ഭൂപ്രകൃതിക്ക് അനുസരിച്ച് അടിസ്ഥാന സൗകര്യങ്ങൾ വികസിപ്പിക്കുകയും കൃത്യമായ ആസൂത്രണത്തിലൂടെ വിവിധ വിളകൾ കൃഷി ചെയ്തുകൊണ്ട് മികച്ച വരുമാനം നേടാൻ കർഷകനെ പ്രാപ്തമാക്കുന്ന കൃഷിയിട ആസൂത്രണം നടത്തണം. അതിനായി ഫാം പ്ലാൻ പദ്ധതി നടപ്പിലാക്കാനും അതിൻ്റെ ഭാഗമായി 10760 ഫാം പ്ലാനുകൾ സംസ്ഥാനത്ത് ആരംഭിക്കാൻ കഴിഞ്ഞു.

കർഷകർക്ക് പ്രയോജനം ലഭിക്കണമെന്നുണ്ടെങ്കിൽ കാർഷിക ഉൽപ്പന്നങ്ങൾ മൂല്യവർദ്ധിത ഉൽപ്പന്നങ്ങളാക്കി, വിപണനം നടത്തണം. ഇതിനായി 11 വകുപ്പുകൾ സംയോജിപ്പിച്ച് മൂല്യവർദ്ധിത കാർഷികമിഷൻ രൂപീകരിച്ചു. ‘കേരളാഗ്രോ’ എന്ന ബ്രാൻഡിൽ കൃഷിവകുപ്പ് ഉൽപന്നങ്ങൾ ആമസോൺ, ഫ്ളിപ്കാർട്ട് എന്നീ ഓൺലൈൻ ലൈൻ പ്ലാറ്റ്ഫോമുകളിലൂടെ വിപണനം നടത്തുന്ന പദ്ധതിക്ക് തുടക്കം കുറിച്ചു. ആദ്യ ഘട്ടത്തിൽ കൃഷിവകുപ്പിന്റെ ഫാമുകളുടെ ഉൽപ്പന്നങ്ങളാണ് വില്പനയ്ക്ക് തയ്യാറായിട്ടുള്ളത്. 100 ഉൽപ്പന്നങ്ങളാണ് വില്പനയ്ക്ക് ലക്ഷ്യമിട്ടതെങ്കിലും 131 ഉത്പ്പന്നങ്ങൾ വിപണനത്തിന് തയ്യാറായി. കേരളത്തിലെ കാർഷിക മേഖല വളർച്ചയുടെ പാതയിലാണ്. മുൻവർഷത്തെ അപേക്ഷിച്ച് 4.64% വളർച്ച കൈവരിക്കാൻ സാധിച്ചു.

ഇടനിലക്കാരില്ലാതെ കർഷകർക്ക് കാർഷികോൽപ്പന്നങ്ങളും, മൂല്യവർദ്ധിത ഉൽപ്പന്നങ്ങളും വിപണനം നടത്തുന്നതിനായി ആരംഭിച്ച വിവിധ എക്കോ ഷോപ്പുകൾ, കോൾഡ് സ്റ്റോറേജ്, പാക്ക് ഹൗസ്, പ്രിസർവേഷൻ യൂണിറ്റ്, പ്രാഥമിക സംസ്കരണ യൂണിറ്റ്, സോളാർ ടൈ്ര സൈക്കിൾ വിതരണം എന്നിവയുടെ സംസ്ഥാനതല ഉദ്ഘാടനവും കൃഷിയിടങ്ങളിൽ സസ്യസംരക്ഷണ പ്രവർത്തനങ്ങൾ നടത്തുന്നതിനുള്ള നൂതന സാങ്കേതികവിദ്യയായ ഡ്രോൺ വിതരണത്തിന്റെ ഉദ്ഘാടനവും നിർവഹിച്ചു.